Фудбалерите на Јужна Кореја со одличен камбек го отворија настапот на Мундијалот, совладувајќи ја Чешка со 2-1 во исклучително возбудлив натпревар од првото коло.
Иако европската селекција прва зададе удар, Азијците на крајот покажаа карактер и сосема заслужено ги прокнижија првите три бода на турнирот. Тие го диктираа темпото уште од самиот старт и постојано се закануваа во првото полувреме, но мрежите мируваа откако Сон не успеа да ја реализира најсериозната прилика.
Старото фудбалско правило дека промашувањата скапо се плаќаат на дело се покажа во 59. минута. По една одлична асистенција на Цоуфал, Крејчи со прецизен удар со глава донесе изненадувачко водство за Чесите од 1-0.
Сепак, негативата не ги обесхрабри Корејците. Само осум минути подоцна (67′), Хванг Ин-Беом со вистинска фудбалска мајсторија и прекрасен лоб-удар израмни на 1-1, враќајќи ја својата селекција во игра.
Вистинската кулминација на мечот се случи во 77. минута. Чесите веќе славеа ново водство по ударот со глава на Соучек, но голот беше поништен поради недозволена позиција. Како гром од ведро небо, веќе во следниот напад стигна суровата казна – резервистот Хион Гуи ја искористи шансата и стрелаше прецизно за 2-1, комплетирајќи го големиот пресврт.
Со овој резултат се затвори првото коло во А-групата. Јужна Кореја и Мексико се издвоија на врвот како победници на стартот, па во следното коло ќе имаат директна меѓусебна пресметка за лидерската позиција. Од друга страна, поразените Чешка и Јужна Африка ќе играат „да се биде или не“ за спас на своите шанси за пласман понатаму.