По обезбедениот опстанок во српската Суперлига, фудбалерите на Раднички 1923 беа физички нападнати од дел од сопствените навивачи на теренот, што резултираше со повреди и шок кај играчите.
Немили сцени се случија во Крагуевац по завршувањето на натпреварот од последното коло на српската Суперлига помеѓу Раднички 1923 и Јавор, кој заврши со резултат 2-2. Иако овој резултат му обезбеди опстанок на домашниот тим во елитната лига, наместо прослава, стадионот „Чика Дача“ стана место на хаос и насилство.
Веднаш по последниот судиски свиреж, група навивачи на Раднички упаднаа на теренот, фрлајќи факели и физички напаѓајќи ги фудбалерите. Според извештаите, во инцидентот биле повредени десетина играчи, а најтешко поминал играчот од средниот ред Милош Ристиќ, кој добил расекотина на усната и повеќе удари во лицето. Меѓу нападнатите биле и неколку африкански фудбалери на клубот.
Ситуацијата дополнително ескалирала кога дел од играчите, заедно со членови на стручниот штаб, биле принудени да возвратат на нападите за да се одбранат. Искусниот играч Милан Митровиќ се истакнал во обидот да ги заштити соиграчите, а поддршка им пружиле и дел од останатите присутни на стадионот кои не се согласувале со насилството.
Тренерот на Раднички 1923, Славко Матиќ, со многу емоции ги опиша настаните, истакнувајќи дека играчите биле во шок и солзи во соблекувалната, и покрај спортскиот успех. Тој направил јасна дистинкција помеѓу вистинските навивачи кои ги бодреле и неколкуте хулигани кои го предизвикале инцидентот, нагласувајќи дека ваков настан е без преседан во историјата на српскиот фудбал.