Леброн Џејмс влегува во лето кое може да го дефинира крајот на неговата кариера. Иако интересот за него е голем, се поставува прашањето кој може да го доведе, со оглед на финансиските и спортските пречки.
Иако Леброн Џејмс е сè уште еден од најголемите играчи во НБА, пазарот за 41-годишниот суперстар би можел да биде изненадувачки ограничен. Според информациите на Марк Стајн, неколку големи франшизи ја следат ситуацијата, но речиси сите се соочуваат со сериозни финансиски или натпреварувачки пречки.
Први на листата се Голден Стејт Вориорс, тим кој со години покажува интерес за Леброн. Идејата Стеф Кари и Џејмс конечно да заиграат заедно долго време изгледа како фантазија на навивачите, но главниот проблем се парите. Вориорс се сериозно ограничени со буџетот и тешко можат да понудат договор кој би бил прифатлив за двете страни.
Се споменува и Кливленд, местото каде Леброн остави најдлабока трага и ја донесе единствената титула во историјата на франшизата во 2016 година. Стајн наведува дека Кавс претходно не биле премногу заинтересирани за уште едно враќање, но евентуален нов неуспех во плеј-офот би можел да го промени размислувањето на раководството. Сепак, прашање е колку третиот мандат на Леброн во Охајо би бил емотивна приказна, а колку вистинско кошаркарско решение.
На листата се наоѓаат и Њујорк Никс. Леброн никогаш не криел колку го сака Медисон Сквер Гарден и целиот њујоршки спектакл, но моментот изгледа незгодно. Никс моментално имаат стабилно јадро, играат големо финале на Истокот и нема многу причини да ја уништат постоечката хемија поради играч кој влегува во завршницата на кариерата.
Можеби најинтересна опција се Лос Анџелес Клиперс. Леброн не би морал да го менува градот, би играл под водство на Тајрон Лу, тренерот со кого освои титула во Кливленд, но останува големото прашање колку Клиперс се навистина сериозен кандидат за шампионски напад. Ако целта не е само проштална турнеја, туку реална борба за прстен, тешко е моментално да се видат Клиперс во тоа друштво. Поради сето ова, сценариото во кое Леброн останува во Лос Анџелес Лејкерс изгледа пореално отколку што многумина сакаат да признаат.
Друга опција која сè повеќе лебди над целата приказна е пензионирањето. Според информациите на Стајн, луѓето од лигата веруваат дека е многу поверојатно Леброн да одигра уште само една сезона, отколку да ја продолжи кариерата на повеќе години. Со други зборови, НБА многу наскоро би можела да влезе во прошталната сезона на еден од најголемите играчи на сите времиња. Ситуацијата целосно би можела да се промени со размислувањето на Џејмс и евентуална одлука следната сезона да игра на ветерански минимум. Во тој случај, „Кралот“ би можел да потпише договор со буквално која било франшиза и така да ја најде најдобрата ситуација. И додека годините неумоливо одат, Леброн сè уште ѝ пркоси на логиката. Оваа сезона бележеше 20.9 поени, 7.2 асистенции и 6.1 скок со 51.5% шут од игра. Тоа е неговиот најмал поентерски просек уште од руки годината, но она што го прави на 41 година никогаш порано не е видено во НБА лигата. Особено е импресивно што сè уште е способен да носи сериозен тим во плеј-офот.
