Иако има 39 години, Новак Ѓоковиќ не се откажува од тенисот, но неговите настапи оваа сезона се далеку од очекуваните. Претстојните турнири се клучни за неговата форма и амбиции.
Најдобриот тенисер на сите времиња, Новак Ѓоковиќ, и покрај своите 39 години, сè уште е активен на тениската сцена, иако оваа сезона ретко успева да стигне до завршниците на турнирите. По финалето на Австралија Опен, тој забележа ран испад на Мастерсот во Индијан Велс, ги прескокна турнирите во Мајами, Монте Карло и Мадрид, а потоа брзо испадна од турнирот во Рим. Сега, погледите се вперени кон Ролан Гарос (18 мај – 7 јуни), но според Грег Руседски, Ѓоковиќ е многу повеќе фокусиран на Вимблдон (29 јуни – 12 јули).
Руседски смета дека Ѓоковиќ се чувствува поудобно на трева отколку на земја, а потенцијалното отсуство на повредениот Карлос Алкараз во Лондон би можело да биде дополнителна шанса за српскиот тенисер. Иако Јаник Синер, кој веќе собори неколку рекорди на Ѓоковиќ, ќе ја брани титулата во англиската престолнина, Руседски верува дека Ѓоковиќ гледа голема можност за триумф.
„Мислам дека Ѓоковиќ размислува дека во отсуство на Алкараз, тоа би била негова голема шанса да победи. Неговата цел е да дојде на Вимблдон што е можно поздрав и подготвен. Ќе се обиде на Ролан Гарос да одигра што повеќе мечеви кои му недостасуваат, можеби ќе се пријави и за некој турнир на трева и ќе се обиде да го достигне врвот на формата во Лондон“, изјави Руседски.
Поранешниот број 1 на АТП листата е убеден дека Ѓоковиќ, седумкратниот шампион на Вимблдон, сè уште има што да понуди. „Новак никогаш не треба да го отпишувате… Ако е здрав и физички подготвен, може да победи секого. Тој е сè уште доволно добар. Иако мислам дека следните недели се ‘биди или не биди’ за него“, заклучи Руседски, нагласувајќи ја важноста на претстојниот период за кариерата на Ѓоковиќ.