И покрај бројните рекорди кои се очекуваат да паднат на претстојното Светско првенство, еден податок останува непоколеблив: ниту еден странски селектор досега не ја освоил титулата на Мундијалот. Оваа година, дури 27 репрезентации ќе бидат предводени од странски стручњаци.
Светското првенство во фудбал е настан каде рекордите постојано се поместуваат. Со воведувањето на новата фаза со шеснаесеттина финале, се очекуваат многу нови достигнувања – можеби Меси или Мбапе ќе станат најдобри стрелци, а Меси сигурно ќе го подобри својот рекорд по број на одиграни натпревари. Сепак, еден статистички податок останува непроменет од првиот Мундијал во 1930 година до денес: ниту една репрезентација предводена од странски селектор не успеала да го освои Светското првенство.
Овој тренд е особено интересен пред претстојниот Мундијал во САД, Канада и Мексико, каде дури 27 репрезентации ќе имаат странски селектори. Иако имиња како Тухел со Англија или Анчелоти со Бразил привлекуваат најголемо внимание, тие се само дел од многуте примери. Полесно е да се набројат оние кои имаат домашен селектор: Аргентина (Лионел Скалони), Франција (Дидие Дешан), Шпанија (Луис Де ла Фуенте), Германија (Јулијан Нагелсман), Швајцарија (Мурат Јакин), Мароко (Мохамед Уахби), Австралија (Тони Поповиќ), Холандија (Роналд Куман), Мексико (Хавиер Агире), Јужна Кореја (Хонг Мјунг Бо), Чешка (Мирослав Коубек), Босна и Херцеговина (Сергеј Барбарез), Шкотска (Стив Кларк), Брегот на Слоновата Коска (Емерс Фаје), Јапонија (Хаџиме Моријасу), Египет (Хосам Хасан), Иран (Амир Галеноеи), Зеленортски Острови (Педро Леитао Брито – Бубиста), Сенегал (Папе Тијао), Норвешка (Стале Солбакен) и Хрватска (Златко Далиќ).
Занимливо е што од земјите финалисти на претходното Светско првенство во Катар, Аргентина и Франција, доаѓаат вкупно 11 селектори на претстојното натпреварување – шест од Аргентина и пет од Франција. Аргентински стручњаци ќе ги предводат Парагвај (Густаво Алфаро), САД (Маурисио Покетино), Еквадор (Себастијан Бекасече), Уругвај (Марсело Биелса) и Колумбија (Нестор Лоренцо). Француските селектори се Себастијан Миње (Хаити), Сабри Ламуши (Тунис), Руди Гарсија (Белгија) и Себастиен Десабр (ДР Конго). Шпанците се исто така добро застапени со четворица стручњаци: покрај Де ла Фуенте, тука се Џулен Лопетеги (Катар), Роберто Мартинез (Португалија) и Томас Кристијансен (Панама), кој иако е роден во Данска, има шпанско државјанство и играше за шпанската репрезентација.