Младиот милијардер Енрике Рикелме, кандидат за претседател на Реал Мадрид, предизвика бура во јавноста со изјавата дека би бил среќен доколку Барселона биде исфрлена во понизок ранг, па дури и целосно да престане да постои.
Енрике Рикелме, 37-годишен милијардер и предизвикувач на актуелниот претседател Флорентино Перез за претседателската функција во Реал Мадрид, предизвика големи реакции со своите изјави насочени кон најголемиот ривал, Барселона. Во екот на изборната кампања, Рикелме јавно изрази желба за драстични последици по каталонскиот клуб.
Коментирајќи го случајот „Негреира“, во кој Барселона е обвинета за наводно купување судии, Рикелме зазеде бескомпромисен став. Иако конкретни докази за овие обвинувања сè уште не се презентирани, Реал Мадрид инсистира на темелна истрага, а Рикелме смета дека Барселона треба да сноси сериозни последици. Тој изјави дека не би имал ништо против доколку клубот биде исфрлен во понизок ранг, па дури и целосно да се угаси.
„Сакам да ја исфрлат Барселона во понизок ранг. Тоа би ме направило многу среќен. Сакам да исчезнат. Не би ми пречело ни тоа“, изјави Рикелме, додавајќи дека не го интересира дали Ла Лига би станала досадна без нив. Овие изјави предизвикаа голема бура во шпанската јавност, особено во Каталонија, каде што се толкуваат како премин на границите на спортското ривалство.
Како дел од својата изборна кампања, Рикелме даде и големи ветувања за засилувања во Реал Мадрид. Тој тврди дека веќе има договор за доведување на ѕвездите на Манчестер Сити, Ерлинг Халанд и Родри, а во случај на победа, најавува и трансфер на Витиња од ПСЖ. Покрај тоа, планира да ја врати клупската легенда Раул Гонзалес на функцијата спортски директор.
Иако Флорентино Перез важи за апсолутен фаворит на изборите закажани за 7. јуни, Рикелме својата кампања ја темели на идејата дека на клубот му се потребни коренити промени. Неговите контроверзни изјави се сметаат за обид да ги придобие најрадикалните навивачи на Реал Мадрид.