Полската тенисерка Маја Хвалинска направи вистинска сензација на Ролан Гарос, заработувајќи повеќе пари за 12 дена отколку за цела десетгодишна кариера, истовремено правејќи огромен скок на ВТА листата.
Светот на тенисот доби нова хероина на Ролан Гарос 2026 година. Полската тенисерка Маја Хвалинска (24) постигна подвиг на кариерата пласирајќи се во полуфиналето на гренд слемот во Париз, откако ја совлада Русинката Ана Калинскаја со 7:6 (3), 6:3. Сепак, она што оваа приказна ја прави филмска е финансискиот и ранг скок што оваа девојка го оствари за помалку од две недели.
Хвалинска професионалната кариера ја започна уште во 2016 година како 14-годишна девојка. За десет години бавење со тенис, до почетокот на овогодинешниот Ролан Гарос, таа од турнирски награди вкупно заработила 743.600 евра. Благодарение на неверојатната серија од пет победи на париската земјена подлога, таа за само 12 дена обезбеди награда од 750.000 евра, со што практично ја дуплираше својата десетгодишна заработка!
Доколку успее да ја прескокне и наредната пречка, наградата се искачува на неверојатни 1,4 милиони евра за финале, додека титулата би ѝ донела дури 2,8 милиони евра. Колку е ова нереален скок за Полјачката говори податокот дека нејзиниот досегашен рекорден приход на еден турнир изнесувал само 29.260 евра, колку што заработила во април со освојувањето на турнирот во Португалија.
Парите не се единствената работа што ќе ѝ го промени животот на Маја. Пред Ролан Гарос заземаше 114. позиција, а на „во живо“ ВТА листата е проектирана на 30. место во светот! Овој скок од 84 позиции ѝ ги отвора вратите на сите големи турнири и ѝ носи статус на носител во иднина.
Патот до финалето води преку уште една Русинка – Дијана Шнајдер (22. на светот), со која се среќава денес (не пред 17:30 часот). Без оглед на исходот од полуфиналето, Полјачката од Париз се враќа како нова ѕвезда на белиот спорт, со капитал што ќе ѝ овозможи да ја подигне својата кариера на сосема ново ниво.