Ајо Досунму, кој пристигна во Минесота среде сезона, брзо стана клучен играч за Тимбервулвс. Сега, како неограничено слободен играч, тој е возбуден за иднината, а неговите одлични настапи сигурно ќе привлечат голем интерес од другите НБА тимови.
Ајо Досунму, кој пристигна во Минесота Тимбервулвс среде сезоната, успеа за само неколку месеци да се наметне како еден од најважните играчи на тимот. По завршувањето на сезоната, бекот отворено зборуваше за своето задоволство од престојот во клубот, но и за возбудата пред неговиот прв излез на пазарот на слободни играчи.
Досунму ја започна сезоната во Чикаго Булс, но беше трејдуван во Минесота, промена која очигледно му донесе многу. Во системот на Крис Финч, тој доби поголема слобода, одговорност и значајна улога во плејоф ротацијата. Особено беше важен за време на доигрувањето, каде често внесуваше енергија од клупата, но и квалитет кога мораше да стартува. Минесота ги надмина очекувањата во плејофот, елиминирајќи ги Денвер Нагетс во серија во која Досунму беше апсолутен херој, пред да ја заврши сезоната со пораз од Сан Антонио Спарс.
На излезното интервју, Досунму не криеше колку му значеше начинот на кој организацијата го прифати веднаш по доаѓањето. „Најважната работа што ја ценев кога дојдов во Минесота е начинот на кој ме прифатија. Дојдов за време на трејд рокот и веднаш ме прифатија. Навивачите се одлични, атмосферата е одлична. Го обожавам сето ова. Првпат бев трејдуван и навистина имам чувство дека ме дочекаа со раширени раце“, изјави Досунму.
Сепак, веднаш потоа јасно стави до знаење дека сериозно размислува и за слободната агенција. „Возбуден сум. Секако дека сум возбуден за летото. По пет години во лигата, ова ми е првпат да влезам на пазарот како неограничено слободен играч и се радувам на тоа. Но, во исто време, овие два или три месеци во Минесота беа одлични. Возбуден сум за иднината.“
Досунму зад себе има можеби и најдобар период во кариерата. Во дресот на Минесота, просечно бележеше 14.4 поени, 4.2 скока и 3.5 асистенции на 24 натпревари, додека во плејофот дополнително го подигна нивото на игра со 15.6 поени, 4.1 асистенција и 3.6 скока по натпревар. Поради сето тоа, Минесота ја очекува сериозна одлука ова лето. Тимбервулвс се веќе под притисок поради потенцијални промени во ростерот, приказните околу Џулиус Рендл и можните големи потези на управата, а Досунму за краток период покажа дека би можел да биде важен дел од иднината на тимот. Останува да се види дали Минесота ќе успее да го задржи или добрите партии во плејофот ќе му отворат врати за поисплатлив договор во некој друг НБА тим.