„Скудерија“ одбележува 30 години од доаѓањето на легендарниот Германец во тимот.
Ферари ќе му оддаде посебна почит на Михаел Шумахер на претстојната трка за Големата награда на Италија во Монца, со која ќе се одбележат 30 години од неговото доаѓање во легендарниот италијански тим.
Болидите на Шарл Леклер и Луис Хамилтон на трката ќе имаат специјална декорација инспирирана од Ферари Ф310 – првиот болид со кој Шумахер настапуваше за „Скудерија“ во 1996 година. На болидите ќе има и седум ѕвезди, како симбол на неговите седум светски титули.
Шумахер пристигна во Ферари во 1996 година од Бенетон и во следните години стана една од најважните личности во историјата на тимот. Со италијанскиот тим освои пет шампионски титули во низа, од 2000 до 2004 година, а Ферари го предводеше и до шест титули во конструктори.
Во Монца ќе бидат изложени и три легендарни болиди со кои Шумахер настапуваше за Ферари – Ф310 од 1996 година, Ф2002 со кој ја освои титулата во 2002 година и 248 F1 од неговата последна сезона во тимот.
Дополнително, болидот Ф2002 ќе биде возен на патеката во текот на викендот. Рубенс Барикело ќе вози во сабота, додека Себастијан Фетел ќе вози почесен круг пред почетокот на трката во недела.
Шумахер има посебна историја со Монца. Во 1996 година токму на оваа патека ја оствари својата прва победа за Ферари на домашен терен, со што стави печат на една од најзначајните ери во историјата на италијанскиот тим.