Новата сезона во Лигата на шампионите ќе започне со емотивна порака од УЕФА. Пред сите натпревари од првото коло ќе биде одржана минута молк во знак на поддршка за народот на Непал.
УЕФА одлучи со посебен гест да го одбележи почетокот на новата сезона во елитното европско натпреварување. Пред сите 18 натпревари од првото коло, кои ќе се играат од вторник до четврток, ќе биде одржана минута молк поради катастрофалните последици од поплавите во Непал.
Разорните поплави што на 26 август го погодија пограничниот регион меѓу Непал и Тибет однесоа речиси 1.400 животи, додека повеќе од 5.000 лица и понатаму се водат како исчезнати.
Покрај минутата молк, на стадионите на кои ќе се играат натпреварите ќе биде истакнат и транспарент со порака: „Непал, не сте сами“.
Претседателот на УЕФА, Александер Чеферин, порача дека целото европско фудбалско семејство ќе застане заедно во знак на солидарност со погодените.
„Целото европско фудбалско семејство ќе застане заедно пред натпреварите оваа недела за да изрази најдлабоко сочувство и поддршка за народот на Непал. Им посакуваме сила и истрајност додека продолжуваат да се опоравуваат од оваа трагедија и нејзините последици“, порача Чеферин.