Македонскиот вицешампион нема да настапува во регионалното натпреварување во сезоната 2026/27, а АБА лигата одлучи испразнетото место да не биде пополнето.
Кошаркарскиот клуб Скопје (по старо Маџари) нема да биде дел од АБА 2 лигата во новата натпреварувачка сезона.
Клубот, кој во минатата сезона ја заврши сезоната како македонски вицешампион, официјално се откажа од настапот во регионалното натпреварување.
Од АБА лигата денеска ги информирале клубовите дека Скопје се повлекува, а одлуката доаѓа откако на состанокот на Собранието на АБА лигата, одржан на 10 септември, било решено празното место да не се пополнува со друга екипа.
Тоа значи дека распоредот и системот на натпреварување остануваат во сила, но ќе има промена во бројот на тимови во групите.
Групата А, во која требаше да настапува КК Скопје, ќе остане со само три екипи. Во групата Б се наоѓа ТФТ и таа ќе брои пет екипи, додека останатите две групи ќе имаат по четири тима.
Повлекувањето на Скопје е нова промена во составот на АБА 2 лигата непосредно пред стартот на сезоната 2026/27. Регионалното натпреварување ќе продолжи со преостанатите екипи, без да биде направена дополнителна замена за македонскиот вицешампион.