Португалија неочекувано ремизира на стартот од Светското првенство, откако одигра само 1-1 (1-1) против Конго во натпреварот од првото коло во групата К.
Португалците одлично го отворија натпреварот во Хјустон и поведоа уште во шестата минута. Педро Нето нафрли од десната страна, а Жоао Невес со удар со глава го совлада противничкиот голман за 1-0.
Се очекуваше фаворитот лесно да го контролира мечот, но Конго покажа дека нема намера да се предаде. Африканската селекција беше опасна преку Жоан Виса, кој прво се закани со удар покрај голот, а потоа во самиот финиш на првото полувреме донесе израмнување. По центаршутот на Масуаку, Виса остана осамен во шеснаесетникот и со глава погоди за 1-1.
Во второто полувреме Португалија ја имаше иницијативата и постојано бараше начин да стигне до победнички гол. Во 55. минута Жоао Кансело ја затресе мрежата со атрактивен удар преку себе, но погодокот беше поништен поради офсајд.
До крајот се заканија и Седрик Бакамбу на едната, како и Кристијано Роналдо на другата страна, но резултатот не се менуваше. Конго успеа да го издржи притисокот и да освои голем бод против еден од фаворитите, додека Португалија со разочарувачко реми го започна настапот на мундијалот.