И покрај одличната сезона, Лос Анџелес Лејкерс размислуваат за иднина без Леброн Џејмс, бидејќи управата бара брз одговор за неговата иднина. Доколку не добијат јасен став до 1. јули, клубот може да се откаже од неговите права за да ослободи буџет за реконструкција на тимот.
По одличниот финиш на сезоната и настапите во плеј-офот, делуваше речиси незамисливо дека Лос Анџелес Лејкерс би можеле да размислуваат за живот без Леброн Џејмс. Сепак, токму такво сценарио полека се појавува зад сцената на НБА лигата.
Според инсајдерот на ESPN, Брајан Виндхорст, во Калифорнија веќе нема простор за чекање и неизвесност. Управата на франшизата сака што побрзо да знае дали „Кралот“ ќе игра и наредната сезона или крајот е навистина близу. Доколку Лејкерс не добијат јасен одговор за неговата иднина до 1. јули, тие би можеле да бидат принудени да се откажат од правата на Леброн (т.н. „cap hold“).
Ова би значело дека неговиот огромен договор вреден 59.5 милиони долари би исчезнал од финансиските книги, а тимот би добил огромна финансиска флексибилност за реконструкција околу Лука Дончиќ. Сепак, со тоа би ја изгубиле и можноста да потпишат договор со Џејмс подоцна во текот на летото. Виндхорст истакна дека оваа година има многу поголема итност отколку претходните, бидејќи Лејкерс мораат да го планираат тимот за наредната сезона.
Се разбира, постои и опција Леброн да остане во Лос Анџелес. Во тој случај, ситуацијата би била едноставна бидејќи Лејкерс ги поседуваат неговите „Bird“ права и можат да го задржат без поголеми проблеми. Меѓутоа, вистинската драма настанува ако четирикратниот шампион сака да ја продолжи кариерата, но не и во дресот на „Езерџиите“. Тогаш Лејкерс би морале да бараат „sign-and-trade“ решение за да не останат без никаква компензација, додека Леброн би добил договор кој го смета за достоен на неговиот статус.
Виндхорст нагласува дека парите не се клучната работа за Џејмс, туку почитта што доаѓа со голем договор и статусот на еден од главните играчи. Во целата приказна веднаш се вклучени и потенцијални кандидати за негов потпис, бидејќи и на 41 година Леброн е сè уште еден од најдобрите играчи во лигата, со просек од 20.9 поени, 7.2 асистенции и 6.1 скок минатата сезона. Самиот Џејмс неодамна во својот подкаст јасно порача дека го интересира само борбата за титула, нагласувајќи дека семејството ќе има огромна улога во конечната одлука.