Германската фудбалска репрезентација од 2027 година ќе ги носи дресовите на Најк, кој веќе започна промотивна кампања со брод и пикселизирани дресови во стилот од 1974 година.
Германската фудбалска репрезентација (Маншафт) официјално ќе се префрли од Адидас на Најк од 2027 година, а американскиот производител веќе започна со промоција на новата опрема. Во краток видео-спот објавен на Инстаграм, Најк го искористи името на сојузната држава Њу Џерси, каде Германија играше против Еквадор во групната фаза на Мундијалот, за двојна игра со зборови: „Hallo, New Jersey“ – што може да се протолкува и како „Здраво, нов дрес“. Видеото е снимено пред Статуата на слободата, со брод кој влече транспарент со натписот „Coming soon“.
На снимката, иако пикселизирани, се појавуваат ѕвездите на германската селекција Џамал Мусиала и Марио Гетце, заедно со дизајнерот Ахраф Ајт Бузалим, основач на германскиот урбан бренд 6PM. Најк коментираше дека „легално не смеат да ја покажат новата опрема“, бидејќи договорот со Адидас истекува дури на крајот на годината. Сепак, се забележува бел дрес со црн кружен деколте, кој потсетува на култниот модел од 1974 година кога Германија го освои Светското првенство во Минхен – токму без трите познати црни ленти на Адидас.
Во долгогодишната соработка со Адидас, основан во 1949 година од Ади Даслер, Германија освои четири светски првенства и три европски првенства во машка конкуренција, како и два Мундијали и осум ЕП за женската селекција. Одлуката на Германскиот фудбалски сојуз (ДФБ) од 2024 година да го смени спонзорот беше дочекана со остри критики, бидејќи многу навивачи сметаа дека со тоа се напушта дел од германскиот идентитет. Дури и тогашниот канцелар Олаф Шолц мораше да се изјасни, велејќи дека тоа не му пречи се додека репрезентацијата продолжува да постигнува голови.
Извршниот директор на Адидас, Бјерн Гулден, во интервју за НТВ изјави: „Болката одамна помина. Тоа е процес во кој имаше избор. Би сакал да беше поинаку, но ако Најк навистина плаќа толку колку што се зборува, нека платат. ДФБ ќе види дали е подобро или полошо.“ Германските медиуми објавија дека преминот има чисто економски причини.