Баерн Минхен не успеа да го скрши отпорот на Шалке и одигра 0:0 на гостувањето на „Фелтинс Арена“ во второто коло од Бундеслигата.
Актуелниот германски шампион беше голем фаворит пред натпреварот, особено по убедливата победа од 5:1 над Штутгарт во првото коло. Сепак, Шалке одигра храбро и успеа да го задржи Баерн без постигнат гол.
Домаќините имаа одлична помош и од Лорис Кариус, кој беше еден од најдобрите поединци на натпреварот. Поранешниот голман на Ливерпул во неколку наврати одлично интервенираше и ги спречи гостите да дојдат до водство.
Баерн уште во раната фаза создаде неколку опасни ситуации. Ленарт Карл се обиде со удар од далечина, а потоа Кариус одлично реагираше и при ударот на Натаниел Браун од непосредна близина.
Шалке, пак, не се бранеше само и повремено успеваше да му се закани на Мануел Нојер. Домашните навивачи му приредија жесток пречек на својот поранешен голман, кој речиси при секој допир со топката беше испраќан со свирежи.
На стартот на второто полувреме Винсент Компани го внесе Хари Кејн, надевајќи се дека англискиот напаѓач ќе го промени текот на натпреварот. Подоцна во игра влегоа и Мајкл Олисе и Џамал Мусиала.
Сепак, ниту нивното присуство не донесе доволно опасност пред голот на Кариус. Олисе имаше можност, но голманот на Шалке повторно беше на висината на задачата. Конрад Лајмер исто така се најде во добра позиција, но неговиот удар заврши во надворешниот дел од мрежата.
Најголемата шанса за Баерн дојде во 87. минута. Кејн упати силен удар од далечина, но Кариус со фантастична интервенција спречи сигурен гол и го сочува својот гол недопрен.
Така, Шалке освои голем бод против шампионот, додека Баерн за првпат во новата сезона не успеа да постигне гол.