Шпанскиот тенисер Карлос Алкараз се врати на тренинзите по повредата, но изненади со тоа што рекетот го држи во левата рака, додека десната ја користи за имитирање движења.
Карлос Алкараз, актуелниот шампион на Ролан Гарос, се врати на тенискиот терен по повредата, но на необичен начин. На видеото што го објави на социјалните мрежи, светскиот рекет број 2 е снимен како тренира со левата рака, додека десната, која вообичаено ја користи за форхенд, имитира удари без рекет.
Carlos Alcaraz is already back on court, did he withdraw from @Wimbledon prematurely? He's made the last 3 finals there, winning 2 of them. pic.twitter.com/d41zSWlGdD
— Pavvy G (@pavyg) June 1, 2026
Повредата на Алкараз се случи во средината на април, за време на турнирот во Барселона, што го принуди да се повлече од Мастерсите во Мадрид и Рим, како и од Ролан Гарос. Сериозноста на повредата стана уште поочигледна кога го откажа учеството на Вимблдон пет недели пред почетокот, што е невообичаено за тенисерите кои обично чекаат до последен момент за да се повлечат од Грен слем турнири.
Оваа ситуација потсетува на слични повреди кои влијаеле на кариерите на Доминик Тим и Хуан Мартин дел Потро. Затоа, Алкараз не сака да ризикува и ќе чека целосно закрепнување. Според „Марка“, Шпанецот тренира во својата родна Мурсија на тврда подлога, што е логично со оглед на тоа што сите важни турнири до крајот на сезоната ќе се играат на истата.
Целта е Алкараз да биде подготвен за Мастерсот во Монтреал (2-13 август), а потоа за Синсинати и УС Опен. Со оглед на тоа што има уште два месеци до овие турнири, тој не сака да ја изгуби физичката подготвеност, па затоа тренира на овој начин. На тренинзите играл и во дубл, а партнер му бил неговиот постар брат Алваро, кој претходно бил спаринг партнер, а сега е асистент на главниот тренер Самуел Лопез. Оваа промена во стручниот штаб дојде по заминувањето на Хуан Карлос Фереро.
Иако Алкараз феноменално ја започна сезоната со освојување на Австралија Опен, станувајќи најмладиот тенисер во историјата кој ги комплетирал сите четири Грен слема во кариерата, а потоа победи и во Доха, неговата сезона тргна надолу по повредата.